المجلس العسكري

الكل أصبح ثري
من بعد طفح الكِيل
حتى اللي كان فنجري
مال للعداله ميل
واللي ف يوم بلطجي
بقى باشا وتوظف
حتى كمان قطتي
من كل شىء الطف
أخضر بلون سُكري
ده المجلس العسكري
-----------------------
كل العشش هدها
والكل بقى ساكن
والشيله أهو قدها
للبلطجي عاجن
حافظ أمان البلد
ماسك مفاتيحها
قافل بيبان سعدنا
حالف ما فاتيحها
مين اللي قال مفتري
ده المجلس العسكري
-----------------------
وادي السجون سدها
ومعدش معتقلات
كل الجسور مدها
ع الدش والإذعات
رافع شعار الوطن
دايماً بيجمعنا
كإنه من أهلنا
نصرخ بيسمعنا
أبو الكلام عنبري
ده المجلس العسكري
------------------------
أسمر سمار قمحنا
مين قال ده متسرطن
دي بلدنا غنوا لها
ياوطنا يا مطنطن
وأنتم ياأهل البلد
سامحوني يا خواتي
لا أنا حمل ضربة كوع
ولا حمل مطاطي
خايف أروح وأنجلي
ده المجلس العسكري


-------------------------------------

علاء أبوذكري[/b][b]