قصيدة " قوليلى ايه تانى" للمشاركة فى المسابقة الكبرى

ياللى انكتب ليكى
حب وغناوى وشعر
مملكش انا فيكى
غير القلم والحبر
وحروف على ورقى
مالت تبوس السطر
لما نويت اكتب
ف حبك انتى يا مصر
ونويت اغنيكى
قوليلى ايه تانى
ف العيد انا اهديكى
مملكش غير حلمى
وف قلبى حبة صبر
وعصايا تسندنى
وساعات تهش المر
جايز ف يوم بيها
اشق بحر القهر
واخدك واعديكى
تترد ليكى الروح
يا هل ترى فيكى
لسة الامل مسموح
يا هل ترى ممكن
نلحق سفينة نوح
ونلم فتافيتك والمؤمنين بيكى
ونعدى بيها نروح
نفتح ببان خيرك تعمر بواديكى
منسبش يوم غيرك يطمع بواديكى
يا عروسة غالى المهر اللى اندفع فيكى
دم الشهيد الحر حنيتى بيه ايديكى
طب قولى ايه تانى ممكن نهاديكى
وانتى الوجع جوانا متشعلقين بيكى
هزى جذوع خوفك
وطهرى الاحزان
عايزين بقى نشوفك
عايشة ف سلام وامان
قومى اغسلى توبك
وزهزهى الالوان
احمر ده لون حرية شرباتها كان الدم
وابيض بياض قلبك رغم الاسى والهم
وسمار بطول ليلك
مجروحة مواويلك
متبعترة بنا
يا مين معايا يلم
يا مين يمد ايديه
يطلعك م البير
غرقانة وحدك فيه
واللى رماكى اسير
يا هل ترى امتى
يهل فجر الخير
يبعت حبال نوره
ويجرى فيكى يسير
وتعودى يا بلادى عزيزة بين ناسك
ضى الكرامة يكون قمرك ووناسك
والعدل فيكى يساوى ملكك بكناسك
يا مصر حتى القلب ف معبدك ناسك
مملكش غير الحب يا بلادى اديكى
قوليلى ايه تانى ف العيد انا اهديكى