قامت قيامتى / شعر/ عبد الباسط السرسى للمسابقة الكبرى أكتوبر 2012

قامت قيامتى
مفتتح
علمنى أبويا إن الحياه
أصعب ما فيها تكون أداه
كلمتين قالهم وتاه
و فـ مطلع الجيل الجديد
لعّب صوابعه عـ الحديد
- درّس العالم حكايته
- إزاى بيصنع إله
- وازاى بيرسم نهايته
-----------------
أول ما مشيت م التحرير
ركبت للدنيا جناحين
و تنك و ديل
وقلت أطير
ففتحت باب الدنيا
الدنيا مش عايزة تدور
الدنيا عايزة زقه
جمعت كل الخلق و .... لسه واقفه
الدنيا روحها محشوره
الدنيا بالعه السنين
الشمس واقفه فى الميادين
نزلت. بقت فوق راسى بشبرين
(الخلق شربت قعدها)
فكيت لجام صوتى و طرت بيه
شقيت السما للديل
الدنيا جايه. ملايكه
وشياطين
وبنى آدمين
الخلق رايحه جايه
الحياه جوه الحياه
بصيت عليها بألف عين
...........................
النار بتعلى بحموها
يطلع غبار بيغطى الوشوش
دخان كثيف
ح يسد عين الشمس
القمر مطوح بعيد
والدنيا بتضلم
شياطين بتقتل ملايكه فى الزحام
وملايكة الحسنات ماشين
إيد ورا و إيد قدام
أروح بتكنس حلمها
بتصحى فى الأموات
وملوك بتموت الأحياء
الميتين بيروحوا للصاحيين
تاهت الدنيا فى بعضها
محتار ملك الموت
(حور عين ولسته بالأسماء)
الأرض بتنتر بنى آدمين
أرواح ونازله م السما
وملايكة بتجمع البيانات
شياطين ناصبين جلين
كمين مطاريد
بيفتشوا الطالعين والنازلين
تايهه الملايكه ومحتاجين لدليل
شارت الملايكه ربطتها
و بحلف اليمين
زقلت طوب فى السما
نزلت كواكبها
محتاج لسطح القمر
يستوعب الزحمة
بصيت عليه . مزحوم برواده
فكيت طيتين م الأرض
و بفك فى التالته
الميه طلعت فوق
غرق اللى فات م الموت
هاتف م السما
عناوين أخبار
مات كل من فى الأرض
و رجعت أرواحهم
و مصيرى لم يحدد بعد
مريت على الدنيا
فقابلنى ابن عروس
فلكته متعلقه بيمد فى الحكام
واللى بينهبوا فى موروثه
" ولابد من يوم معلوم "
............................
واخدنّى الملايكه لفوق
بيكرمونى ومركبنى حمار
اشتغلت عليهم
وقعت الملايكه فى بعض
سحبوا اللجام منى
جريت بين السما والأرض
خبطت ع الجنه لقيتها مقفوله
عديت ع النار
يااااااه خلق يا ما
متعرفش تحط رجلك
فارجعت للدنيا
لامح من بعيد . ثلاث أهرامات
وعيال و صويت
وبهايم وحمير وبنى آدمين . وشباب تايهه
سكرات نعاس تمسكنى وتسبنى
خبط دماغى الرصيف فوقنى
و أنا فى انتظار
فرصة عمل