للإشتراك في المسابقة الكبري (للشعر العامي) قصيدة ( المزاد )

نصَبوا الصوان للمزاد
وتلم خلق اللاه
مع كل رنة جرس
فيه ناس تدوب ف البُكى
وناس تقول الله
وناس بتوب السواد
تبكي على اللي فات
وناس بتوب الأمل
مش عارفة إيه العمل
والبركة ف الجايات
مزاد وعالي التمن
أصل الضحية وطن
دمعه بلون النيل
ضيّه كما القنديل
قلبه نجيل أخضر
نسماته كالعنبر

( 2)
فُتِحت بيبان المزاد
والكل مستني
ودموع بلادي تنادي
يـا ميين يحوش عني
مخنوقه يافرحتي
مقهورة يابلدي
ميين عَلِمِك تبكي
ميين خَلى قولة الأأأأأأأأأأه
طالعه بلون الدم
يا منظمين المزاد
خَلوا المزاد يتلم
ليه بعد ليل البُكى
نزرع جناين هم

( 3)

صوت الشهيد ف المزاد
عالي كصوت البرق
لا عمره يوم بيموت
برصاص ولا له حرق
باطل مزاد البيع
ياعم يامنادي
تمن البلاد مدفوع
من عهد أجدادي
مدفوع بلون أحمر
ساكن ف شرياني
طلعت أدفع لها
من غير متسألني
إن كنت معجب بها
أو كنت علماني
أصل الحقيقة إنها
من شكلي عارفاني
وقف مزاد البلد
وبص شوف قدام
لو يوم يغيب الولد
الدم مش بينـــام
(4)
ضرب المنادي الجرس
خلى كلامنا سكوت
وسمعت مر الالم
محفور ف نبرة صوت
معرفت صوت الحياة
وَلاّ أنين الموت
يا وطنا بطل بكي
دمْعَـــك بيكويني
حالف لشيل دمعتك
وامسحها بجبيني
لو ضيّ عيني تمن
يبقي التمن موجود
وشوف بعين الوطن
وزرع حدوده ورود
وأهدم جدار الأسي
وأعدي منه وأفوت
وأحلم بيوم يازمن
ضحكة بلادي تعود
-------------------------------------
علاء أبوذكري من ديوان ( ولسه الحلم جوانــــــــــا)

[/right][justify][/justify]

[/b][/b]

» اغنية (جوانا إيه) للاشتراك في المسابقة الكبري للشعر الغنائي
» عمري ما هنسى - الشاعر علاء أبوذكري ( للإشتراك في مسابقة الشعر الغنائي ) المسابقة الكبري
» قصيدة (وتر مِتــــهان) للإشتراك فى المسابقة
» قصيدة " بورتريه " ... للإشتراك فى المسابقة ...
» قصيدة (قوللي انت مين ) للاشتراك في المسابقة الكبري للمربعات