قصيدة متزعليش

متزعليش
واقف على باب الزمن باندهك
يمكن يكون في حد فيكي لسه صاحي
يمكن يكون القلب تايه في الضواحي
يندهك يا أم الضفاير
يا أم الولاد السمر اللي قاعدين ع المكن
يطرح عرقهم توب قماش
بلون أحمر
يسطرلك مواويلك
ولون أبيض
بلون قلب الولاد الشقيانين
ولون أسود
على دماغ اللي عايزينك تشيلي الطين
يا أرض طيبة والجدود الفلاحين
بضربة الفاس
بيخرج زرعك العطشان
لمية نيلك السلسبيل
يا أم الجنود
اللي ما خلق زيهم رب العالمين
في المحن دايما ولادك موجودين
أنا يا امة لما بتصرخي
صوتك يمزع قلب كل السهرانين
علشان يشيلوا الدمع من فوق العيون
ما تحزنيش
ما هو ياما دقت على الراس الطبول
مهما قسيتي يا غالية
ومهما عليك اتكتلت كل المحن
لا ف يوم هاننسى الحلم لو طالت سنين
يا أم الضفاير مجدولين
إوعي تظني إننا
قدام صراخك راح نقف متقيدين
دا من سنين
وقف الولاد السمر قدام الجحافل مشدودين
لما صرخ أحمد عرابي
قال للبشر أحرار هنفضل مولودين
ما احناش عبيد
ولا كنا يوم ورث لجماعة موتورين
واما وقف سعد الحليوة الاسمراني
قال يا بلد
ابنك يا مصر أهو بيعصر في السنين
لاجل الخواجة ما يختفي
من تحت شمسك
ما هيا مصر باقية من زمان
قول يا جمال
يا ناصر الشعب اللي ضاعت من عيونه الابتسام
لازم يا مصري ترفع الراس الأبية
زمن الوسية
ولّى ومشي
وف نصرك اللي وقّف عقارب الزمن
عدينا فيه كل المحن
متزعليش
ما هو كل دول من زمان مستنيين
ننام يا غالية عن نواطيرك يومين
علشان فى غفلة من زمان الصامدين
ياكلوا ف لحمك
بس مين
والله يا مصر لو حكمت
لاكل لحومهم نية بسنان المكن
ولو بقى منه أرميه للكلاب
إوعي يا مصر ف يوم تخافي
ما احنا دايما سهرانين
نحمي حماك وف الشدايد موجودين
نامي يا مصر واملي بالنوم الجفون
والله ف سماه ما نهدى
ولا النوم تشوفه العيون
إلا يا مصر وانت رافعة
في السما لفوق الجبين