لما يجي العيد

(1)
لما يجي العيد
وكل حبايبك الغالين
بعيد
يبقى عيد
لما تقضي الليل وحيد
والحنين والشوق
يزيد
يبقى عيد
******
(2)
لما يجري العمر منك
إيه فاضلك
غير حكاية
عن شبابك والصبايا
لما كنت زمان شديد
يبقى دا اسمه برضه عيد
******
(3)
كل أحلامك سراب
ليلة حزن ويوم عذاب
حتى لو تفرح شوية
تلقى جنبك ميت غراب
يخطف الفرحة الحزينة
وأنت تفضل طير شريد
يبقى دا اسمه برضه عيد
******
(4)
والصغار أحلام جريئة
وابتسامتهم بريئة
والعيون مليانة ضي
بس لما بيسألم
ملهمش زي
أنت إمتى يا بابا جي
شفت أطفالك يتامى وانت حي
فات شبابهم فات صباهم
وأنت مش موجود معاهم
أيوه لابسين الجديد
بس دا اسمه برضه عيد
******
(5)
لما يجي العيد
وانا ف بلاد غريبة
فيها ناس بقلوب حجر
وناس حبيبة
اللي طيب والقريب
واللي يضحك لك بطيبة
قبل ما يجيب لك مصيبة
وأنت في وسط الزحام
تتفرم لو يوم تنام
والليالي والدقايق والساعات
لفها الخوف والسكات
واللي جاي يا صاحبي مش قد اللي فات
والصداقة عملة نادرة
وشيء فريد
يبقى دا اسمه برضه عيد
******
(6)
صارت الأعياد
بعاد
واللقا ملهوش معاد
واللي جايلك ف الطريق
قهر وعناد
امتى يتحول زماني
امتى ح تشوف الأماني
الحلوة
ف عيون الولاد
شمعة الأحلام تقيد
واحنا إيد بتشد إيد
علشان نحس ف يوم بعيد
******

خالد عز الدين

نعم هو عيد لان هذه الاحاسيس استطاعت ان تخرج ابداعك الجميل

أشكرك يا استاذ هاني على هذه المشاعر الرقيقة ودعمك الرائع

شاعرنا الحساس خالد عز الدين ليس لزاما على ان اكتب ولكنى كتبت لانك حقا فنان وشاعر مبدع اتمنى لك مزيد من التألق وان تسعدنا بكتاباتك تحياتى

شكرا لك على المساهمة الراقية
الشاعر خالد عز الدين
ودى وتقديرى

» لما يجي العيد
» جانا العيد
» عادل صابر . رباعية كفن العيد