طريقنا طويل .. منال درويش . القاهرة

طريقنا طويل
منال درويش . القاهرة
_____________
*************
مفتتح :
طريقنا طويل ،
ح نتلاقى ..
سنابل قمح سباقة ،
وزرع نخيل ..
وفرحة طرحة أشواقنا،
لحضن النيل ..
ح نتلاقى يا مصر النيل ..
يا شمسنا شقى السحابة ،
وإطرحي كل الشموس
دي طرحها ،
طرحك يا طينة أرضنا
كل المسافات الكتير ،
في يوم تلملم شملنا ،
وفي يوم ح تزرع،
ارضنا شهد العسل
ونعيد ما ضينا ،
اللي انفصل عن شملنا!
**
يا زرعتى اللي،
انكسى منها الولا.
وغزلى من قطنى الحرير
توب الفرح !!
يا فرحتى لما باشوفك يا وطن
ثابت كما صخر الجبال
ده قلبي يومها بينشرح
**

كل السكك متفرعة
كل الطرق م المبتدى للمنتهى
راح تنتهى في حضن الوطن
**

آآه يا وطن ،
ما ضاعت يوم،
ملامحك ع الخريطة .
محفورة صورتك ،
جوة في نبضى أنا
من كام سنة !!!
آآه يا وطن كل السنين
دا انا عشقى لترابك ،
بدرته غيط درة .
لفيته بجناح من نخيل
يا حب دايب جوة،
فِ قلوب الولاد وياالبنات .
يا شجرة مبدور شعرها ،
مفرود على جبين القمر
متكحله بتراب وطن ،
ما عرفش فِ يوم الندم
لانه شال كل الذنوب ،
عاشر وشوش متزوقة ،
والكره ينضح م ِ القلوب
**

آآآه يا وطن ،
افرد شراعك ،
لجل ما تعدى المراكب كلها
لملم دفوفك والقلوع ..
لا يوم ح تشرد مركبك
ولا الموانى راح تخون،
تعب السنين
**

آآه يا وطن ،
كل الموانى والطرق،
ح تنتهى عندك هنا
من قبل ما يجي الزمان ،
بينا هنا !!
كل الموانى والطرق،
راح تنتهى،
في حضنك انت يا وطن .
راح تنتهى في حضنك هنا

...
[b]

شكرا لك على المساهمة الراقية
ودى وتقديرى

» فى عيد الحب . منال درويش . القاهرة
» اعلام الفسدة المأجورة . منال درويش . القاهرة
» جايز يكون لساه بطل . منال درويش . القاهرة
» فِ بحر الحب . شعر منال درويش
» ارمى همك . شعر منال درويش