أول غناوي العشق . احمد كامل

أول غناوي العشق

و رغم انفلات الوتر
وبرغم طول الشرخ ..
فـ الصوت المغني ,
بعافر ..
إني أخطف من عيونها ..
غنوتي
و ألفني فـ سلوفان ندا
وردة ما بتدبلش

لسه حبيبتي ..
و اللقا سماوات متعلقة ,
علي طرف احتمالات التوحد ..
أو فراق الروح
و انا لسه فـ عيونها _ الربيع _
علامة استفهام !!
لسه القمر .. فاير
و الأرض مشبوكة ,
فـ كعب خطوة تقيلة ..
بتعافر
الحلم تكعيبة عنب ..
وقت الخريف
سؤال بطعم الدهشة ..
فـ الحلق الخشب
ليه كل ما باضمك ..
بتتسرسبي ؟
تنفرطي أحزان علي كتافي
أتبعتر علي السكة ..
تغريبة وجع
طرحك ..
تسابيح تهجد ليل ..
بيدخلني
ونهار ..
بيخرج من عيوني يتوه
قلبك ..
شمس عشقاني المغيب
عشقك غريب
قلبي لهيب ..
والتلج بيحاوط ,
جدار الصمت فـ عيونك ..
تحدي
قلقانة ع الشباك ..
ستايري
والريح .. يناير

لسه حبيبتي ,
بريحة الدهشة فـ عطور اغترابي
و الجّي .. ( جابي )
رابط ما بين عقد الوجع ..
و زهرتين صبّار
لو كان فراق
فـ اسمحيلي إني اضمك
أنشق فوق صدرك ..
غناوي .

شكرا لك على المساهمة الراقية
ودى وتقديرى

» ثورة . احمد كامل
» اعتراف . احمد كامل
» بشاير . احمد كامل
» سِفرالحياه والموت . احمد كامل
» ترنيمات على وتر العشق