ثورة . احمد كامل

ثورة

ضاقت ,
ولما استحكمت ..
خنقت بواقي الروح
نزفت عروقي ..
اللي فاضل مني فيا
قلبي اللي كان
صندوق بريد للأمنيات
راجع وحيد
مع أول ..
شروق للشمس جوايا
آخر رسالة بتوصله
مع آخر غروب بيدخلني ..
بيسألني
أنا ليه غريق ؟
وليه بأجل ثورتي ..
وبتفاوض
أدمنت ليه الوجع ..
ولون الدم علي جلدي
وانتظار الفرج ,
بالدعوة في الصلوات
قلبي البرئ ..
مات
والموت نهاية للألم
وبداية للإجابات

أول سؤال انطرح ..
إجابته كانت .. مُر
آخر سؤال انطرح ..
إجابته مش عندي
ضميتي ليه قلبي ..
لما انتي مش عايزاه ؟
فرّقتي ليه ضلي البرئ ,
ع الأربع اتجاهات ..
ومشيتي عكس السير ؟!
سافرت فيكي طريق ..
ملقتلكيش آخر
قلبك ما عادش الوطن
متجهزيش الكفن ..
لسة العمر فيه باقي
لسة حيجيلك طوفاني
حزنك نزيف جرحي
حتحسي بيه فـ وقته
وقت اما تنزل من عيونك
أول دمعة .. تبكيني
ساعتها ..
قلبي حيصرخ ..
يعلن الثورة

شكرا لك على المساهمة الراقية
ودى وتقديرى

» ثورة / أحمد كامل
» اعتراف . احمد كامل
» بشاير . احمد كامل
» أول غناوي العشق . احمد كامل
» سِفرالحياه والموت . احمد كامل