قصيدة ( بحبك يا بلدى )

قصيدة ( بحبك يا بلدى )

--------------------------

بحبك زى نخلة تتمايل

ولا تطاطى

وحتى لو رموكى بالرصاص الحى

او حتى مطاطى

يا نخلة مزروعة

ف حضن التاريخ ع النيل

طول ما انتى عالية

سيبك من الواطى

*****

بحبك زى طير عشش

على ولاده

بجناح سنابل دهب

والطرح فى ميعاده

لو التاريخ محتاج لنورك

نورى الصحبة

اصل التاريخ ابتدى

عندك وبميلاده

*****

بحبك زى نسمة نادية

فوق جبال الصبر

ضحكة وصداها

يمحى نار الغدر

يا سوسنة خضرا

وناضرة وعفية

انا كل ما انبش وافتش

بالقاكى ف كل حرف وسطر

*****

بحبك زى مادنة

طرحها تكبير

وأدان واخدنا

من صغير لكبير

يا ام الغلابة

ياطيبة وطاهرة

متفرقيش بين الوزير

وغفير

*****

بحبك زى زغرودة

لبنوتة بحنتها

مالى عنيها الخجل

وعارفة سكتها

ومسلسلة الخوف

حبساه فى زنزانة

وعمرانة اليالى

مع صفو ضحكتها

*****

بحبك زى صرخة

تصيب كما المدفع

دول مش ولادك

اللى خانك واللى

عاش يرتع

دوول مهما بدلوا

الوشوش خاينين

اصل السماح للخسيس

عمره ما بينفع

*****

بحبك شمس طوبة

مش رياح امشير

بحبك خير بؤونة

وزقزقة عصافير

يا صفصافة على الترعة

ضللها شاهد

ودافن تحت طينه

الاف زعابير

*****

بحبك ومش عارف

بحبك ليه

بحبك يا واخدانى

فى قلب التيه

بحبك وانتى مش

عارفة ومش دارية

بحبك موت

يا اسرانى

يا بنت الايه

يا مصر بحبك

........................

ناصر على توفيق _ سوهاج

________________

___

شكرا لك على المساهمة القيمة
وإن شاء الله القادم أجمل
لك أرق تحية وباقة من الفل والياسمين

» قصيدة ( بحبك يا بلدى )
» بحبك يا بلدى
» قصيدة : بحبك
» قصيدة بحبك شريف عبد الفهيم
» قصيدة بحبك ............. للاشتراك فى المسابقة الكبرى