الحرف التايه:

الحرف التايه:
**********

تدور بينا سواقينا
وتجرحنا …!!
مع الصخرة اللي بتلامس
جوارحنا ….!!
فِ عز الصيف
نلاقي خريف يصبحنا
نقول الآهة …يرد صداها
يجرحنا ….!!!
يضيع الحرف فِ النبض
اللي تاه بينا …!!
يخاف الحرف يتكلم
لا نعرف اننا فِ محنة..!!
****************
تدور بينا حروف الكلمة
مخنوقة………!!
وقلب الغنوة مسروقة
وحلم ع البيبان ضايع
ونور الفجر مش طايع
تمد الإيد ….ولا تلاقي
تتوه فِ القلب أشواقي
ندوق الصبر ونعيشه
ويفرد ع القلوع ريشه
فنستسلم….!!
تموت الفرحة جوانا
ما نتألم …..!!
ويهزمنا هوان الخوف
يغور الجرح ويعلم
وتنزف أرضي تتألم
يا خوفي يا حلم لا تسلم
يا صوت لحق ليه
مسجون ما بين جدران
عشقت العتمة والتوهه
قفلت على الاماني بيبان
وبعترت الامل فيا
جفانى الاهل والخلان
وضحكة عمر منسية
فِغربة موج بلا شطآن
يا ريحة الارض
حدوته فِ قلب أذان
لملينى جوة حضنك قلبي محتاج
للأمان
آهين يا طعم الظلم
فِ الموال …….!!
مسجون يا صوت الحق
فِ الاغلال….!!
آهين يا مشوار السنين
قصايد شعر راح تنقال
وحرف الغنوة مش طايل
و تايه فِ البلاد رحال
و فات ناسه وكراسه
وداره ع المدي اطلال
يعشش فيها بوم الغاب
يحول حلم عمره ،، سراب
تدور بينا سواقينا .
تبدل بالمرار أحوال.
____________________
منال درويش

شكرا لك على المساهمة القيمة
وإن شاء الله القادم أجمل
لك أرق تحية وباقة من الفل والياسمين