شيطان الأنابيب !!!!!!

** وانا قاعد مخنوق متكدر ** وف شنطتي قبضي وبفكر **


**ازاي بس أعيش واتدبر ** وانا قبضي منصاب بجفاف **

***********************

** تعبت راسي من الأفكار** زي مريض محتاج للزار **

**نفسي أعدي ع الجزار **علشان تفرح زوجتي عفاف **

***********************

**تعمل لينا كباب في الحله ** ونجيب لب عشان نتسلي **

**وتزورنا المانجه علي غفله ** ويدفي جتتنا لحاف **

***********************

**فُقت بسرعة من الأحلام** قلت أنا قبضي أصلا كام **

**دا حتي مريض وعنده زكام ** طول الوقت جيوبي نضاف **

***********************

**وفضل فكري ف راسي يدور ** واللي يشوفني يقول مسحور**

**فجأه ناداني بتاع النور ** قمت دعيت أنا ع الكشاف **

***********************

**بعد شويه واد شغال ** عند كريم موسي البقال **

**فضح الدنيا علي الأموال ** قلبي ساعتها طب وخاف **

***********************

**قام ع الدوشه أيمن جاري ** قاللي بسرعه ناولني ايجاري **

**قلت ف نفسي ياويللي ياناري ** دا لسانه مليان اسفاف **

***********************

**بعدها طلعت زوجتي الحلوه ** عارفه الحاله .. وتقول كسوه**

**ما بقينا في زمان القسوه ** وم الغربال الأعمي ما شاف **

***********************

**لحياتي أنا هاعمل خطه ** علشان أتخلص م الورطه **

**قمت بسرعه جريت ع الشنطه ** لسه ماليها من الصراف **

***********************

**قلت لنفسي خلاص هتروق ** لقيت القبض كمان مسروق **

**في المشمش أو في البرقوق ** هالقي لبحر ديوني ضفاف **

***********************

**يسرق واحد زي ازاي ** وانا من ضنكي بصرخ جاي **

**ده الرايح علي قد الجاي ** مش محتاج وضعي لعراف **

***********************

**يسرقني وانا م الجوع خاسس ** مش حاسس بيه مش حاسس **

**أتقرصن ع القبطان فارس ** وكسر لي كمان المجداف **

***********************

**م الحيره غلبت حماري ** منها كمان تعبت أفكاري **

**ولا عارف أخبي ولا اداري ** حتي حق العيش الحاف **

***********************