المطحنة - كلمات محمد سعد دويدار

المطحنة
----------

استلافنا الضحك مرة بعدها مابقاش يفيد
اللي داير كله حالُه عايشه مر مافيش جديد
الوشوش فرحانه بره وفي القلوب ألفين وجع
واللي صالب طوله فينا لسه بيشوف البدع

فيكي البدع يادنيا هدي وارحمي
علِّيتي ناس علي حس ناس وبتظلمي
حطيتي ناس جانب الحيطان في المطحنة
وناس جبانه عيشتي فيها تكبري

حلمك علينا يادنيا حبه واختشي
ليه كل ما نطلب فرح بتطنشي
أما الوجع بتهادي بيه كل البشر
وعلى الغلابه بتفتري وتهمشي

اللي فيكي من جحوده عيونه حسدانا بغباء
يبقى شبعان بعد جوعَه ولسه طمعُه فيه وباء
واللي ياما عاشرنا واحنا كنا ليه ضهر وسند
أما ضاق الحال علينا جاب لنا حاله اكتئاب

اللي عاش مبسوط ولما طلبنا منه قال مافيش
كان أساسا م البداية ماكنش لاقي عشان يعيش
بس لما وقفنا ياما معاه عشان يكبر ويعلى
كُنا لافين الحواري وع المصاطب كَلنا عيش

فيكي البدع يادنيا هدي وارحمي
علِّيتي ناس علي حس ناس وبتظلمي
حطيتي ناس جانب الحيطان في المطحنة
وناس جبانه عيشتي فيها تكبري

نعمل إيه علشان تصفي معانا يومك
احنا أما نضحك مرة نغرق بين همومك
بنروح من الحزن اللي فينا على الألم
وأنتِ اللي فرحانة بعذابنا قصاد عيونك

فيكي البدع يادنيا هدي وارحمي
علِّيتي ناس علي حس ناس وبتظلمي
حطيتي ناس جانب الحيطان في المطحنة
وناس جبانه عيشتي فيها تكبري

حلمك علينا يادنيا حبه واختشي
ليه كل ما نطلب فرح بتطنشي
أما الوجع بتهادي بيه كل البشر
وعلى الغلابه بتفتري وتهمشي


كلمات:محمد سعد دويدار
#محمد_دويدار
#محمد_سعد_دويدار
21.04.2024