متر في متر لمحمد سعد دويدار

#متر_في_متر
يلّّي معبي الذكايب أخرتنا متر في متر
وإيه لازمة فلوسنا مين غير أدب ولا ستر
الفقر فقر نفوسنا مش فقر مال ولا جاه
الجاحد عاش بيظلم ولا مال قارون كفاه
..
فيه ناس غلابة ولاد حلال متعزبين في العيشة
راضيين تملي بغُلبهم  لو حتى ناموا على خيشة
وناس بتمشي في الحرام غرتهم التحويشة
القرش سيدهم كبروه واتهتوا من تهويشة
..
متر في متر أخرنا ياسيدي .. باقي العمر ثواني يادوب
إحنا بنصغر في الدنيادي .. وعداد عمرنا بالمقلوب
ماشين فيها ناسيين نفسينا .. وفبعضنا عيبنا وعضينا
أدي الدنيا خدتنا في دوكة .. وفخ جرينا وراه منصوب
..
زي ماجيت الدنيا هتمشي .. مش واخد ولا حاجة معاك
هتودعها بكل حبايبك .. واللي عملته هيستناك  
صافِّي النية طهر قلبك .. لازم قبل ماتمشي تتوب
أصل هتبقى بعملك حتى ..  لو كانوا عملوا كفن بجيوب
..
متر في متر أخرنا ياسيدي .. باقي العمر ثواني يادوب
إحنا بنصغر في الدنيادي .. وعداد عمرنا بالمقلوب
..
فتح عينك وشوف الطبع والعادة
ياما ناس معاها ألوف وقلوبها حسَّادة
وناس حسب الظروف شقيانة مش لاقية
تلاقيها دي الباقية وبتدعي بالسعادة
..
زي ماجيت الدنيا هتمشي .. مش واخد ولا حاجة معاك
هتودعها بكل حبايبك .. واللي عملته هيستناك  
صافِّي النية طهر قلبك .. لازم قبل ماتمشي تتوب
أصل هتبقى بعملك حتى ..  لو كانوا عملوا كفن بجيوب
..
أدي الوضع وحال الدنيا مهما يكون أليم
ميزانها لسه مانقلبش وحاله على السليم
أصل الشبعان تملي بيكون راضي بقليله
واللي مكوش وجاحد هيعيش ويموت لئيم
..
متر في متر أخرنا ياسيدي .. باقي العمر ثواني يادوب
إحنا بنصغر في الدنيادي .. وعداد عمرنا بالمقلوب
#متر_في_متر
#محمد_دويدار
كلمات: محمد سعد دويدار