لأول مرة تنشر كاملة قصيدة غياب لمحمد سعد دويدار

كتبت القصيدة في 26/8/2017
وأول عرض لها صوتيا ببرنامج مرسا الفن بإذاعة القناة بالإسماعيلية وتم اذاعة الحلقة في 24/1/2018
-----------------
بداية  الْحكاية في نظْرة عيونك
وأوّل بداية لطوق النجاة
بنظرة بتسحر تداوي ف جروحي
وضحكة بتزرع في قلبي الحياة
رسمت بحنانك حياتي وطريقي
ولا كنت افكر في انك تغيبي
حَلفتي بحبي وعهدي معاكي
فَصدقت انك لايمكن تسيبي
وقلبي يأمنك ويفضل معاكي
ويرفض لبُعدك ويعشق هواكي
ويحلف بعمره لأجلك تملّي
بإنك أماله وحياته ف لُقاكي
وكان ضهر ليكي بكلمة لسانك
وكان كل أملك بفعلك معاه
تمر الليالي تزين غرامك
يشوفك وافيّة ودايبه ف هواه
واتاري اللي ظاهر بيخدع في روحي
مرتب طريقه ليوم الفُراق
بورقة وقسيمة تسطّر جروحي
وتمنع لُقانا بكل اشتياق
كتبتي القسيمة وكنت الضحية
فرحتي بقساوتك ودمعى ف عينيا
بحارب في نفسي وعايش باصونك
فَخُنتي وعودنا بظلم وقسيّة
ف لو كان عليا هصابر واسامح
وهنسى ان قلبك بيغدر وجارح
واداوي جروحي بعزة وكرامة
وابطّل أشوفك وازيد الملامة
دا قلبك أساسا ملوش العتاب
دا عايش حياته كأنه ف ضباب
بينكر تملّي جميل الأحبّه
وكلمة أحبّه في كونك غياب
(محمد سعد دويدار )