الشاعر حلمى ابراهيم . يوميات من الزمن اللى راح جيّ

مدخل

على عرق خشب

قايم على منفعة البيت

ملفوف وش ابويا ف سجاده

وامى اللى اتوضت من ابريق مكسور

استنت بعد ماصلى السُنه

قامت هيّ تجيب الفرض

عتبه

بعد ماجابت كسرتين تانيين

رجعت تجر الحبل مستوره بعورتها

بدأت تعد من واحد

طلعت بالريموت بره

1

لما باشوف الواد الواقف على باب الشارع

بيغرّز عينه فى الماشيييين

وحيطان البيت اللى اتاكلت

من بص الناس

باتأكد إن ابويا وعمى

قلقوا م الواقفه ف صورة الميه

المتاخده على قنطرة العمر

ملحوظه

كان ابويا وعمى اخوات

فات ابويا وشوفته واخد الأرض قياسه

كانت كل اراضى بلدنا ف راسه مشاع

كانت بتهرب فيه

على فكره

مدرسة ابويا مافكتش خط

كانت بتاخد ع الزمن تجاعيييييد

2

على اخر درجه ف سلم ابويا

شوية بوص ومباريم خشب

ومشروع للخير

فى دولاب الحيط

كمبيالات ورهنيات

وكلمة شرف

ع الرف التانى

شال وسبحه يسر

ومتر عضم

ماكانش يقيس لحم الناس

من وقت لوقت

بالمح ضي عنيْه

وهيّ بترصد ميل المادنه بتاعت الكَـفر

اتنين مللى

وقعِت بعد

مَ

مَ

ا

ت

حلمى ابراهيم