( الدستور ) نص من كلمات الشاعر حمدى موسى
و ( دستور ) معارضة شعرية كلمات الشاعر محمد فتحى السيد
وقراءة تحليلية ونقدية للنصين . بقلم الدكتور أسامة عباس
---------------------------------------
أولا ( الدستور ) للشاعر حمدى موسى
الدستور
.....
باب الأشواق
......
المادة الأولى مانيش قادر
على بعدك يوم
وكمان مش ناوى أكون مهزوم
المادة التانية
اللجنة أقرت إنها عيب
وان انا موتور
انا طالب بوسه عشان معذور
فيها ايه بقى يعنى ومالها البوسه
يبقى خلاص
كلموا كلية طب النسا
يلغوا الدكتور
.........
باب الأوجاع
.....
المادة الأولى
العاشق يعمل ايه لو مات
وازاى يتحلى بأى صفات
ويقول لحبيبته بأى لغات
انا ميت فيكى
وانه مفيش ازاى بعديكى
وامك ليه وقفت الخلفة
وقالت بس كفاية بنات
المادة التانية
لازم حتما لا ستنساخ
لازم نعمل منك قارة
نحدد نوع الأنثى عليكى
عشان النوع من غيرك باخ
المادة التالته
اللجنة اعترضت ع التلميح
انا قلت يا دوبك كلمة حضن
اومال لو كنت طلبت صريح
انى ادوب فيكى
واشوف بعنيكى
واكون الهدمة اللى بتكسيكى
وحق الحب وحق الشعر
انا عمرى حبيبتى ما كنت قبيح
لكن معلش
اللجنة اصابها دوار الشعر
وطلعت ميح
.....................
باب الأحلام
.....
المادة الأولى
معادشى ف زمن الحب منام
وانا وانتى حبيبتى بنسكن بيت
من شعر قديم
مكتوب بعنيكى مفيهشى كلام
ومفيش صحيان
ومعادشى كيان
هيفرق بين ارواحنا خلاص
قررنا كمان إلغاء الشمس
عشان الحلم مفيهشى ضلام
المادة التانية
بدون تفسير القلب كبير
واكمنى عزيز الحب بغير
وطلبت بفتح ميدان الصبر
ونلغى البعد من التفكير
اللجنة أقرت بالأحلام
وأقرت طبع مواد العشق بصوت أنغام
وسلام العشق وعلم الشوق
لازم يتحيا ف كل منام
ولابد يكون فيه استفتاء
على كل جموع الشعرا
وكل بتوع الكلمة الصابحة
وكل الراشد م العشاق
----------------------------------
ثانيا ( دستور ) للشاعر محمد فتحى السيد
دستور . افتح قلبك للنور
هتلاقي حواسك عادله
الحب مالـوش دستور
ولا أي قانون لمعادله
ولا أي مواد لشعور
ولا بند عتاب ومجادله
الحب ملايكه وحور
فستان وبيحضن بدله
.. . .. . .. . ..
الحب مالوش معايير
ولا حصر مابين مسافات
الحب دا لغز كبير
أسراره في السماوات
لا بيعرف غني وفقير
ولا فرق مابين طبقات
الحب كأنه أثير
وإذاعه بكل لغات
.. . .. . .. . ..
الحب مالوهش طقوس
محتاجه بنود ولجان
لا مجرد حضن وبوس
ولا فعل بيرضي الجان
الحب شعور محبوس
وساعات في العين بيبان
ولا يوم يتباع بفلوس
ولا تمنع شوقه بيبان
.. . .. . .. . .. محمد فتحي السيد
------------------------------
ثالثا القراءة النقدية للدكتور أسامة عباس
يا سلام على الشاعر الواعي المفكر , الذي يبحث عن افكار جديدة وصياغة جديدة وتراكيب مبتكرة , دستور للحب والمحبين يعاقب من يخالفه , وأي أبواب واي مواد ,باب الأشواق باب الأوجاع وباب الأحلام وكل باب له مواد وقوانين وتفاصيل كثيرة , لكن يبدو ان دستور حمدي يشبه دساتيرنا العربية لمصلحة الحاكم ضد المحكوم وكثيرة الطرق والتفاسير والوجوه , هي الحاكم الظالم دائما رغم الدستور والقانون الذي يحاول شاعرنا من خلاله إنصاف العاشق المسكين , لا يصل العاشق لنتيجة ولذلك يطالب شاعرنا بمطالب كل العشاق ( وطلبت بفتح ميدان الصبر
ونلغى البعد من التفكير
اللجنة أقرت بالأحلام
وأقرت طبع مواد العشق بصوت أنغام
وسلام العشق وعلم الشوق ) , وفوق كل ذلك استفتاء , ولا ينسىى شاعرنا المبدع أن يستحضرألفاظ وتعابير الحقل المعجمي للدساتير والحراكات من ميدان واللجان وقبل ذك الحقل المعجمي للحب وآثاره ومفاعيله ومطاليبه ومطالبه
, فكرة جميلة وصياغة راقية , وايقاع جميل على الهزج الرائع ( مفاعيلن مفاعيلن ), بناء متين وتشكيلات جميلة قصيدة وجدانية معبرة , سلمت
لا تقل المعارضة جمالا وإبداعا عن القصيدة , العكس تماما هل يحتاج الحب لدستور وهل يحتاج لكتابة ومواد وتفاصيل , هذه الأسئلة التي يبدعها شاعرنا المبدع الشاعر محمد فتحى السيد والتي يبتدئ منها معارضته الجميلة , يعكس شاعرنا الصورة فيقرر أن الحب مالوش دستور , لا يحتاج المحبون إلا لفتح قلوبهم للنور ( , افتح قلبك للنور .. هتلاقي حواسك عادله .. .. الحب مالوش دستور ) الحب نور وقلوب مفتوحة الحب مشاعر وأحاسيس وليس قوانين ولا معادلات والمشاعر ليس لها مواد ( ولا أي قانون لمعادله .. ولا أي مواد لشعور ..) الحب يحتاج للعتاب ولكن العتاب ليس مادة ولا قانون واجب ( ولا بند عتاب ومجادله .) الحب ليس له معايير ( الحب ملايكه وحور .. فستان وبيحضن بدله .. . .. . .. . .. الحب مالوش معايير .. ولا حصر مابين مسافات .. الحب دا لغز كبير .. أسراره في السماوات .) ( لحب شعور محبوس .. وساعات في العين بيبان ) ( ولا تمنع شوقه بيبان .. . ) , يجيد شاعرنا استحضار تعابير الحقل المعجمي للحب اشواق واحاسيس ومشاعر وما الى ذلك ويمعن في الدفاع عن وجهة نظرة في مقابل الدستور والمواد والقوانين , التشكيل رائع ثلاثة مقاطع من مربعات الأرابيسك المعشقة المنفصلة من حيث الشكل والمتصلة من حيث المضمون ..الإيقاع رائع على المتدارك ( فعلن فعلن ) مع انه يقترب في بعض الأحيان من الرجز او الكامل وهذا جمال الأرابيسك . قصيدة رائعة ومعارضة رائعة , وجهتي نظر متعاكستان في المطلب متوافقتان في المضمون , المطلب دستور مكتوب أو لا دستور , وتتوافقان بمزايا الحب وخصائصه بأحاسيسه وأشواقه ومعاناته , شاعران كبيران ونصان رائعان , سلمتما
د. أسامة عباس
----------------------
موضوع: الدستور لحمدى موسى ودستور محمد فتحى السيد وتحليل د . أسامة عباس 
الأحد 27 مارس 2016 - 14:16
