فؤاد حداد . بضاعة الأمريكان

مسحراتي منقراتي

مرة في حياتي

دخلت سيما شفت اللي

أتى

كان ياما كان

حمار حصان

بجوزين حوافر .. وجوز

ودان

عليه مسافر شجيع جبان

يشب فوقه .. ويحدف

بطوقه

ويقل ذوقه .. عِيان بيان

وحبيبته شقرا

في ايديها زهرة

في عينها زغرة

ودموع كمان

طب سيبنا من دي

سيبها في أمان

أدي في الأمام

أحمر وهندي

داهن ودهان

داهندي هان

وأبو عين قوية هات يا نشان

يقتل له ميه ويمضغ لبان

وبعد غيبته يرجع بخيبته

يخض حبيبته

شوف الحنان

ودا علم واللا

دا حلم واللا

يا فيلم واللا

دا شيء جنان

سهرتنا ضاعت على

بضاعة الأمريكان

كان ليه ندور في غير مكان

إحنا اللى نور فينا الآدان

لازم نطور حواديت زمان

فمن الميدان

شعر العروبة

بحر العروبة .. والعنفوان

زى العيدان

نبتت ولادى في كل ناحية

بَهتف لتحيا

فنون بلادي

المشى طاب لي

والدق على طبلى

ناس كانوا قبلى قالوا في الأمثال

الرجل تدب مطرح ما تحب

وأنا صنعتى مسحراتي

في البلد جوال

» الأسطى فؤاد موجود . فؤاد حداد
» فؤاد حداد . معلومات عنه
» فؤاد حداد . الأمل
» فؤاد حداد . المراجيحي
» فؤاد حداد . حب الوطن