محمود هليل الهلالى وميرفت حموده ( ألفين مليون سلامه )

الشاعر محمود هليل
الفين مليون سلامه
والعمره مقبوله
كنتى ف رحاب النبى
قولتيله كام قوله
ماهو الصلاة والدعا
فى الروضه مكفوله.........

الشاعرة ميرفت حموده
يوم مادخلت وشوفت جماله
روحي سابتني وحامت فوق
عاوزة تشبع مهماً قالوا
عمره ف يوم ما هيرضي الشوق

الشاعر محمود هليل.........
صلى الله عليه وسَلم
حبه اتمدد جوا سنينى
مهما إن قولت عليه وأتكلم
أنتِ اللى هتحكى وتشجينى

الشاعرة ميرفت حموده.........
اتحضرت ف زي عروسة
لأجل نصلي في التنعيم
روحنا هناك والروح محروسة
ورجعنا علينا التحريم

الشاعر محمود هليل..........
ها وبعدين يلا انا مشتاق
لرسولنا فى روحى الاشواق
بعد ما صليتوا واحرمتوا
اصلى لطه انا مالعشاق

الشاعرة ميرفت حموده............
بص ياسيدي
طوفنا ببيته الغالي دعينا
سبع مرات وقلوبنا تهفهف
وفي حجر اسماعيل صلينا
وطيور البيت فوق بترفرف

الشاعر محمود هليل..........
الله الله بيته جميل
طوفتى يا حاجه سبع مرات
عقبال حجه وروحنا تميل
واحنا بنرمى فى الجمرات
ها وبعدين

الشاعرة ميرفت حموده........
اه راح اقولك
روحنا الصفا والمروة نهرول
زي ما امنا هاجر عانت
شوفنا الاعجاز لما اتحول
من صخر لنبع مياهه بانت

الشاعر محمود هليل........
الف تحيه والف سلام
أمنا هاجر ويا غلام
مادد رجله وعمال يضرب
وامه تهرول لأجل مايشرب
فجأة الصخر انشق بنبعه
رب العزة مش بينام
قولى كمان

الشاعرة ميرفت حموده........
كنت هناك وانا بادعي لربي
قلبي يطير ويلف سماه
كان مش قادر حتي يهدّي
من كتر حنينه للقاه

الشاعر محمود هليل.........
كل ما تحكى شوقى يزيد
ارجع تانى بقلب وليد
قلبى يرفرف يحمد ربه
وارجع تانى بعمر جديد

الشاعرة ميرفت حموده.......
راح اكمل لك
وف رحلتي لحبيبي رسوله
كنت باسابق عاوزه ازوره
شوقي اليه كان واخد قلبي
شايلة كلام جوايا اقوله

الشاعر محمود هليل........
رحتى وزورتى رسول الله
بلغتيه سلماتى وشوقى
قولتى واتكلمتى معاه
حبه بيجرى جوه عروقى

الشاعرة ميرفت حموده.........
بص كمان
لما دخلت الروضة الخضرة
بين بيته ومنبره في علاه
صليت ودعيت ربي بقربه
اني افضل في رحابه معاه

الشاعر محمود هليل...........
لما دخلتى الروضه ف طاعه
شوفتي الصحبة جنب نبينا
ذورتى حبيب الله فى وداعه
شفيعنا ونورنا اللى منجينا
ياللا اشجينى واحكى كمان

الشاعرة ميرفت حموده.........
يااااااااه
اه لو اقدر افضل جنبه
واروي القلب بجنة حبه
اكتبهالي يارب كتير
ولكل اللي بيدعي بقربه

الشاعر محمود هليل..........
صلى الله عليك يانبينا
صلى الله على آل البيت
وبحوضه بإيديه يروينا
انا للقاه والله حنيت

الشاعرة ميرفت حموده.........
الفين صلاه وسلام ومحبة
علي اغلي واحب رسول
اكتبهالنا يارب وصحبة
خلي الشوق دايما موصول

سجال جميل
سعدت بالمتابعة فشكرا لكم
مودتي واحترامي

» موال ......يا عم .....أيمن عبدالعال سلامه
» رباعيات/ أيمن عبدالعال سلامه
» أبو زيد الهلالي سلامه الفارس والشاعر المعروف
» إصحى يا دنيا...أيمن عبدالعال سلامه
» كش ملك / محمود جمعة