مساجلة فى مربعات فن الواو . مجموعة شعراء

جزء من مساجلة قوية وفريدة من نوعها
---( فى مربعات فن الـــواو )---
شارك فيها عدد كبير من الشعراء
بدأت بمربع للشاعر عبد الستار سليم
وكان الشرط الأساسى فى كل المشاركات
تثبيت الشطر الأول بحيث لايتغير فى أى مربع
اخترنا لكم أفضل المشاركات فى هذه المساجلة
وكانت أثناء حوادث القطارات فى عهد محمد مرسى
----------------------------
1 / الشاعر عبد الستار سليم
غبّر فى وشى بابورك
عاملالى لمه و غارة
رمتينى فاخر طابورك
و بلعنى ليل المغارة / عبد الستار سليم
----------------------------
2 / الشاعر محمد فتحى السيد
غبّر فى وشى بابورك
كـتملى كل المسالك
توه خضارى فى بورك
و نهارى أنا و مسا لك / محمد فتحي السيد

غبّر فى وشى بابورك
يا دنيـا طــال الـغـيـاب
احبابى سكنم قبورك
و حـالى أصبح هـباب / محمد فتحي السيد

غبـر فى و شى بابـورك
نـزلـت دمــوع الـنـدامـه
الـخـلق نامت فى دورك
ع النهضه يالله السلامه / محمد فتحي السيد

غبّر فى وشى بابـورك
و انا من الـهـم طـافـح
ضيع جـمـالك غــرورك
حلفت عمرى ماصافح / محمد فتحي السيد

غبّر فى وشى بابورك
فـرم الــولاد البـريـئـه
و الدم بـين جمهـورك
بـكا الرجــال الجريـئه / محمد فتحي السيد

غبّر فى وشى بابورك
عضت لحـومنا ـكلابك
طلعتى عرجك وعورك
و دفنتى زينة شبـابك / محمد فتحي السيد

غبر فى وشى بابورك
لـحـم و دم و تـراب
ودعت أجمل زهورك
والحلم أصبح سراب / محمد فتحى السيد‏
-------------------
تابع باقى الشعراء بالمشاركات التالية

3 / الشاعر هاشم عوض الله
غبّر فى وشى بابورك
يرحم زمان الحمارة
سايقه البابور رافعه زورك
وابوكى بواب عمارة / هاشم عوض الله
-------------------
4 / الشاعر سمير أحمد القط
غبّر فى وشى بابورك
ضاعت معاه ابتسامه
طلعت الشمس بحضورك
ترمى فى حضنك سلامة / سمير أحمد القط

غبّر فى وشى بابورك
تاهت فى قدمى علامة
كتب قلمى ف سطورك
عادت لروحى السلامة / سمير أحمد القط
----------------

5 / الشاعر كمال الحمرانى
غبر في وشي بابورك
ومعدي واخد في وشـه
قلبي بعته يــــــزورك
خايف بابورك يدشــــه / كمال الحمراني

غبر في بابـــــــــورك
عبي العميمه ترابـــي
اهو جاني يادنيـادورك
جرحك مربي ترابــــي./ كمال الحمراني

غبر في وشي بـــابورك
الله يجازي الفرامــل
اهوجاني يا دنيـــــادورك
والجرح ربي دمــــامل/كمال الحمراني

غبر في وشي بابــورك
ولا حتي ضارب سارينـه
زغللتي عيني بنـورك
جرحك في قلبي سالينـه./ كمال الحمراني

غبر في وشي بابــورك
والدنيا كيف كحل ضلمـه
ع الخلق ليه طافيـه نـورك
ومفرقه كـل لمــه / كمال الحمراني

غبر في وشي بــابورك
وبيدي واقف أشــاشي
اهو جاني يادنيـا دورك
حزمت صلبك بشـاشي / كمال الحمراني

غبر في وشي بابــورك
ودهسني تحت العجـاله
الصبر راكب بابـــــــورك
فاتنا قلوبنا عـجــــالـه / كمال الحمراني

غبر في وشي بابـورك
فاتني في سوق النخالـه
ياللي انتي فارده شعـورك
علي كتف كله نـــداله/ كمال الحمراني

غبر في وشي بابــورك
نطيت بقيت في السـبـنـسـة
حالفه لا توفي نـــدورك
آن الآوان ولا لســـــــه / كمال الحمراني

غبــر في وشي بابورك
ترابه مع الحـر لافح
داقه في ارضي خابــورك
ومقطعالي الملافــح / كمال الحمراني

غبر في وشي بــابورك
كاسر لكل الحواجــز
دايما"تحني شعـورك
والمر مالي القـــزايـز / كمال الحمراني

غبر في وشي بابــورك
و القطر حاد عن مسـاره
ميته بقي يفج نـــورك
و القلب تجبر كســــــاره / كمال الحمراني

6 / الشاعر محمد عودة
غبر في وشي بابورك
ما همني من غباره
هاسبح واعدي بحورك
والصبر ماحلى مراره / محمد عودة

غبر في وشي بابورك
وانا بـعـمل لك الشاي
يا رب يحرق في زورك
وتـحللي يوم عن قـفـاي / محمد عودة

غـبـر في وشي بـابـورك
مش دي مـجــايـب أبـوكـي
يـحـرق ضـلالك و زورك
عـلى سلسفين مين جـابـوكي / محمد عودة

غبر في وشي وابـورك
فـاتـني و عـدى سـريـع
ما دمتي شاربة غرورك
قـلبـك ها يصبح صـريـع / محمد عودة

7 / الشاعر حامد عامر
غبر فوشي بابورك
قلبلي كل المواجع
وبعت قلبي يزورك
حلف يمينين مراجع / حامد عامر

غبر فوشي بابورك
حببني فالهم دايم
غرقت مراكبي فبحورك
وده كله لاجل الغنايم / حامد عامر

ـ غبر في وشي بابورك
و قلب ميزان العداله
ملعون ابوها قصورك
ابدا ماتشبع قواله / حامد عامر

غبر في وشي بابورك
خلاني اجري لمقامك
وبايه يفيدني بخورك
ما قتلتي روحنا بمنامك / حامد عامر
-------------------------
8 / الشاعر حماده النخيلى
غير فى وشى وابورك
طريقك ما عادش سالك
تقعد وتستنى دورك
فى سكتك ياما هالك / حمادة النخيلي
----------------------
9 / الشاعر نزيه تركى
غبر فوشي بابورك
خربت بيتي و نايم
من كتر ظلمك وجورك
لحمك هخليه رمايم / نزيه تركي

غير فوشي بابورك
بكفايه قـلـنـا و قـال
لما الكبير يبقي شورك
هتزيد في عين الرجال / نزيه تركي

10 / الشاعر على جامع
غبّر فى وشّى بابورك
دبـّل نضارة عيالك
مين اللى عطّل أمورك
وجاب جميع العيا لك / علي جامع

غبر فى وشى بابورك
عمت عنيا غبارته
تغورى ويغور غرورك
قلبى اللى حبك نحرته / علي حامع

غبر فى وشى بابورك
غباره مالها مثيل
جبناه يضوي لنا نورك
عيشنا فى ليل ٍ طويل / علي جامع
------------------------
11 / الشاعر مصطفى صوار
غبر فى وشى وابورك
و بدون ما يدى اشاره
اجف واستنى دورك
خدلك وشين عفاره / مصطفى صوار

غبر فى وشى بابورك
ولا خفت زى اللى خاف
انا لقمه واقفه فى زورك
هقلب سنينك عجاف / مصطفي صوار

غبر في وشى بابـــورك
خلانى انسى ملامحى
قاعد ترعى فى قصورك
ونسيت عيشى وملحى / مصطفى صوار

غبر وشى بابورك
ودهسنى تحت عجاله
دا دمى اصبح فطورك
والندل ياكل عياله / مصطفى صوار

12 / الشاعر عبد البارى امام
غَبَّرْ في وشِّي بابورك
شَعْوَط حَوَاجْبِي وشُعُورِي
لَوْ صَح ْ عِشْقِي و بُورِك
كنتي راعيتي شُعُورِي / عبد الباري امام
----------------------
13 / الشاعر محمود عطيه
غبر فى وشى بابورك
توهنى وسط الزحام
حتى فى اتفه امورك
بطلت اسطر كلام / محمود عطية
---------------------

14 / الشاعرة شوقية كامل
غّبر فى وشى بابورك
وتهت وسط الزحام
لا لاقيه دورى ف طابورك
ولا لاقيه فيكى سلام / شوقية كامل

غّبر فى وشى بابورك
دخانه غطى الوشوش
لاشفت سكة مرورك
ولا شفت وشك بشوش / شوقية كامل

غّبر فى وشى بابورك
و فرشت ليلى دموع
ياما غرقت ف بحورك
و تهت من غير رجوع / شوقية كامل

غّبر فى وشى بابورك
وسهم حبك رمانى
وجعلى قلبى غرورك
والحزن ياما عمانى / شوقية كامل

15 / الشاعر عادل شوقى
غبر في وشي بابورك
جايني شايل الهم
طفيت في عنيه نورك
والسكه غرقت دم / عادل شوقى

غبر في وشي بابورك
وأنت ولا داري
ساكن في أجمل قصورك
وسايبني أنا ف ناري / عادل شوقى

» الجواز ... مساجلة فى مربعات فن الواو لمجموعة شعراء
» مربعات فن الواو . مجموعة شعراء
» سيد محمد . مربعات فن الواو
» مساجلة فى مربعات فن الواو تضم 53 مربع عن حوادث القطارات
» هلال ابراهيم . مربعات فن الواو