انا الثوره

وقامت ثورةالغلبان تهز الريح
تصحى الناس
تلملم جرحها وتقوم تدق طبولها
ع الحراس
يطل المصرى من سجنه يشوف النور
يكسرالترباس
يشوفها العامل يقوم يجرى
وفلاحك يشيل الفاس
ينزلها على نظامك... نظام الزير
نظام الشلــه واللمه والشرطه والدبابير
نظام يبيع بـ 100 زمة .... ويجوعنا بالدساتير
ولو حبينا نتكلم بيسجنا !!
بالقوانين والتقارير
وفى التحرير.....
كنت انا همك وأحلامك
انا اللى وقفت قدامهم على شانك
انا اللى مت م التعذيب فـ اقسامك
وفى الاخر قالوا عنا خاينين لأعلامك
وإعلامك .......
بيوصفنا بالخارجين على القوانين والدساتير
يامصر فوقى
انا التشريع انا الدستور انا الثوره انا التغيير
انا عدلك
أنا حزنك انا فرحك انا شهيدك اللى فى التحرير
انا صوتك انا الزحمه فى الاتوبيس وفرن العيش
انا الطوابير
انا الراضى انا الزعلان انا ..الانسان
وروحك الحلوه فى التعبير